Uluntu lwase-Luzie Drift phantsi koMaspala waseElundini lunemincili nochulumanco, oku kusemva kokuba uMphathiswa weSebe leMfundo ePhondweni uFundile Gade enikezele ngokusesikweni isikolo samabanga aphantsi esitsha kraca iLuzie Drift. Eliziko lemfundo nelisemgangathweni ophezulu lixabise i- R112 yezigidi zeerandi, yaye lixhotyiswe ngobuchwephesha bokufunda yale mihla.
Ukwakhiwa kwesi sikolo kuqale ngenyanga ngonyaka ka-2020 njenge nxalenye yephulo lokuphuhlisa iziseko ezingundoqo ezikolweni, i-Accelerated School Infrastructure Development Programme. Eli ziko lemfundo lwamnkela ngokusesikweni abafundi ngoJanuwari walonyaka umiyo.
Eliziko litsha liquka ii-ofisi zokusebenzela kwabafundisi ntasapho, amagumbi okufundela alishumi elinanye(11), igumbi lobunzululwazi, Igumbi elisetyenziselwa iintlobo ngeentlobo, iholo lokutyela, kunye neholo yesikolo. Kukwakho ibala lezemidlalo, indlu yonogada, igumbi lokugcina impahla, kunye nendawo yogutyulo nokucoca.
Esi sikolo sikwaxhotyiswe ngombane, izindlu zangasese ezingamashumi amabini anesibini(22), iitanki zamanzi ezingamashumi amathathu anesibini(32), nepitsi lokutsala amanzi(borehole), yaye sikwabiyelwe ngocingo ukuqinisekisa ukhuseleko.
Umphathiswa uGade uthi eli phulo yinto engaphaya kokunikezelwa kweenkonzo esithi Lo ngumqondiso wokunikeza ithemba kunye nokuzibophelela korhulumente wePhondo kwimfundo esemgangathweni.”
Ngelixa kusakhiwa eli ziko, kudaleke amathuba emisebenzi nokuvuselela uqoqosho nanjengoko le projekthi iqeshe oonokontraka basekuhlaleni abalishumi elinesithandathu (16) kwakunye nemisebenzi elikhulu elineshumi elinesine(114)
Sithetha nje, iLuzie Drift Primary inabafundi abalikhulu elinamashumi asixhenxe anesithandathu(176), kwaye nabasebenzi abalishumi elinesthathu(13) abaqeshwe isigxina kunye nabasebenzi abaxhasayo. Esisikolo sinembali yokugqwesa ngezinga eliphezulu kwezemfundo rhoqo, yaye oku ngumqondiso nobungqina bootitshala nabafundi abazinikeleyo kwimfundo nokufundisa.
Eliphulo liyinxalenye yemizamo karhulumente yokutshintsha izakhiwo zezikolo ezingekho semgangathweni, ngenzame zokukhuthaza imfundo nophuhliso, ngethemba lokuqulunqa ikamva eliqaqambileyo kwabemi beli.
